الخميس، ١٤ يونيو ٢٠٠٧

يا ويلكم! القطع المبرمج جايكم!!


لا هذا مو عداد الrpm مال البي ام!!
هذا عداد استهلاك الكهرباء في الكويت أمس الساعة 12:41 الظهر!!!
التاريخ14 ينيو (حزيران)
يعني تو الناس على الحر!ّ

وحتى الثانية عشرة و41 دقيقة ظهر أمس، وصلت الأحمال الى 8305 ميغاواط.. وحينها درجة الحرارة كانت 43.6 درجة سيليزية، والرطوبة %9.2... جريدة الوطن
وهذا حسب (العداد 92%)


فيما زادت هذه الارقام حتى كادت ان تبلغ الخط الأحمر عند الرابعة عصرا... بعدما وصلت في الثانية ظهرا الى 8508 ميغاواط، وهو ما يشير الى زيادة 200 ميغاواط خلال ساعة واحدة.
وهذا بحسبة بسيطة يساوي 94% من اجمالي انتاج الطاقة بالكويت!!




الله يستر من القطع المبرمج!!!
المصدر: جريدة الوطن

دهان الbmw!


اهداء الى عتيج الصوف!!

سيارتي العتيدة!! معاي من سنة 2001، من أول سنة بالجامعة.. "الدابة الصالحة"
ثبت في الأثر أن خير متاع الدنيا الزوجة الصالحة، والدابة الصالحة، والدار الفسيحة "ما كان عندي وقت أجيب نص الحديث"
كان ينطبق على سيارتي البندين الثاني والثالث "كانت سيارتي بيتي الثاني، مرة نمت قي السيارة لما كنت رايح المخيم من البرد!!"

يا جماعة شهالديرة اللي شوارع مثل الأوادم ماكو؟!! كله صخر ورمل وحصى و و و و سجائر!!
نعم سجائر!!
تمشي في أمان الله ولا شرارة تطيييير من السيارة اللي جدامك وتصيب سيارتك!!
أوف! بكل براءة تطق الليت العالي "يعني احتجاج"

ولا الشاب اللطيف يخفف السرعة ويصف على يميني، نزل الجام نزل الجام!
الشاب اللطيف: عسى ما شر!!!!
العبدلله: ما شر..
الشاب اللطيف: ليش تكبس!!
العبدلله: سجارتك اللي قطيتها حاشت سيارتي!!
الشاب اللطيف: شنو!! عسى ما تعورت سيارتك بس (بكل سخرية)؟!
"طبعا أنا طالع من الكلية الساعة 12:30 بالليل ، النفسية الله أعلم فيها، قريب من امتحان!!، وقبلها هم خفارة لي العشر!!"
العبدلله: أقول عسى ما تعورت عيونك بس من الليت العالي!!!
الشاب اللطيف: شنو!!!!
العبدلله: اسم الله على عيونك من العوار!! ليش ما تحط على سيارتك من ورى "عيوني فيها حساسية من الليت العالي"!!!
البغل اللي يم الشاب اللطيف: اقول اصفط اصفط!!
"طبعا أنا ما كنت شايفه من كثر ما كنت معصب، مع ان المكان مو مكفيه!!"
"والله جان أصفط، مع ان في مثل هالحزة، الواحد دايما أسلمله يطوف وما يرد على شوية خمة لا مستقبل ولا أهل ولا وراهم شي، لا وعلى شنو؟ على سيجارة وليت عالي!!"
نزلت بسرعة وأطير حق "لا مو البغل أكيد" الشاب اللطيف وقبل لا أقول شي مد ايده وسلم!!!!!
قلت له: سيجارتك اللي قطيتها حاشت سيارتي!! وانا طقيت لك الليت العالي، الحين شتبي!!!
قال : هاه!!
البغل: عسى ما شر؟!!!!
قلت "وكنت معصب، والعادة ما أرد على هالأشكال": قط سيجارته على سيارتي وطقيت له الليت العالي!!! انت عسى ما شر!!
الشاب اللطيف: آسفين يبا.
أنا "وقد طخيت شوي": لا عادي ماكو مشكلة.
وعطيتهم ظهري وكل واحد ركب سيارته
وما صار شي :)
أول ما ركبت السيارة قلت حق نفسي: أنا شسويت؟!! الله ستر، لو هذول الشباب كانوا من النوع اللي ما يتعامل؟!!
الله ستر.
أوصيكم بأذكار الصباح والمساء، مجربة :)


p.s:
السيارة كانت للتصليح لأسباب أخرى غير الحادثة المذكورة أعلاه، عوامل الزمن وصدمات خفيفة أخرى :(
p.s 2:
السيارة كنت موديها عشان يصير لها نيو لوك، وتنظيف لأني كملت البند الأول "أعلاه" وما بغيت الأهل يركبون سيارة كان منطبق عليها البند الثالث!! ;)

p.s 3:
ليلحين ما شريتها، إذا شريتها أقول لكم p;

الأربعاء، ١٣ يونيو ٢٠٠٧

جائزة أغبى صفطه! "1"


يستحق هذا اللطيف الجائزة:) . لاحظ إن المكان يسعه:( لكنه أبى إلا إن يشارك في مسابقة الصفطة الاحمق.. فكان له شرف الفوز. مبروك ومنها للأدنى!

.شهاب طارق

.
مقال رائع من الزميل الطارق

ليلة الامتحان الأخير!


الساعة 12 بالليل. طالع من الكلية. آخر 9 ساعات قبل الامتحان. ما ادري ليش تذكرت لوحة دافينشي العشاء الاخير:)
قررت اطلب عشاء;)

الثلاثاء، ١٢ يونيو ٢٠٠٧

تو الناس!


بعد ما خلصت معظم الدفعات اختباراتها:-)
الرابطة الموقرة تحط إعلانها;)
صباح الخير بالليل

K net is here!


أخيرا ما نضطر نطق درب إلى جمعية الجابرية بس عشان نسحب شوية قريشات نفسفسهم على ستاربكس اللي يبيع القهوة بدينار ونص! على فكرة.. هذي قصة نجاح ستاربكس.. أنه اقنع الناس إن سعر القهوة ممكن يكون أكثر من دينار!!

شكر خاص اتحاد الطلبة على جهوده في تركيب الجهاز في كليتنا وكل المواقع الجامعية
مواطن صالح